Petisyon pagpakunhod sa pletehan giduso

CEBU, Philippines – Nisang-at og petisyon si kanhi konsehal Augustus Pe Jr. sa buhatan sa Land Transportation Franchising and Regulatory Board niadtong Biyernes aron paghangyo nga kunhuran ang pletehan sa mga public utility jeepneys (PUJ).

Tuyo ni Pe kunhuran ang pletehan sa PUJ gikan sa P7.50 ngadto na sa P7.

Kini human iyang naobserbahan nga matag karon ug unya ang pag-us-os sa presyo sa lana.

Isip usa ka negosyante nga may 500 ka tawo, iyang gibutyag nga daku ang iyang pagbati alang sa iyang mga trabahante ilabi na nga ang P7.50 nga plete mamahimo pa nga P8 kay dili suklian sa mga drayber ug konduktor. Nanawagan si Pe sa mga consumer groups ug uban pa’ng pundok nga suportahan ang iyang petisyon.

Samtang alang kang Ryan Benjamen Yu, pangulo sa Citrasco, nga wala sila’y problema sa petisyon ni Pe apan iyang gitug-an nga kun adunay pag-usbaw sa presyo sa lana kinahanglan usab nga usbawan dayun ang pletehan.

Matud ni LTFRB-7 acting director Reynaldo Elnar nga sa ika-duhang semana sa Disyembre ipahigayun ang public hearing alang sa maong petisyon. – /GMR) (BANAT NEWS)