Pulis nanion og armas sa buwangan

CEBU, Philippines – Usa ka pulis sa Argao ang gikatakdang imbestigahon tungod sa pasangil nga misulod kini sa usa ka bulangan nga armado ug nanion og tawo niadtong Nobiyembre 16 ning tuiga.

Si Senior Superintendent Noel Gillamac ang hepe sa CCPO miingon nga usa ka Chad Branzuela ang mireklamo batok kang Police Officer 2 Nilo Branzuela. Matud pa sa reklamante nga aksidente niyang natumban ang tiil sa bata-bata sa maong pulis nga miresulta sa ilang panaglalis ug komprontasyon, apan misumbong ang bata-bata sa pulis ngadto sa iyang amo. Dangtan ang pila ka gutlo, misulod si PO2 Branzuela nga nagdala og armas ug giliab siya niini.

“Pagpalit nako og sigarilyo sulod sa buwangan, pag-atubang nako iya kung gikwelyohan gitionan ko niya og .45 sa agtang. Iya kung giingnan nga ‘wala ba ka nahibalo nga ako ning tawo nganong imo ning gihilabtan?, ako siyang giingnan nga natumban ra ang tiil sa imong tawo nangayo pa gani ko og sorry,” matud pa ni Chad kinsa midugang nga human sa agtang gitionan usab siya sa dughan.

Sumala pa sa reklamante nga iyang pasakaan og kaso ang maong pulis bisan pa man og kini parehas niya og apelyedo.

Apan si PO2 Branzuela nangrason nga igo siya nga miresponde human nga matud pa gisumbag ni Chad ang iyang silingan nga asset sa ilang police station, apan iyang gihimakak nga nanion siya og armas. “Mitubag ko og alarma ako siyang gi-pasify unya arogante man siya kaayo mao ‘to nga ako siyang giingnan nga magpa-blotter mi sa barangay, pero dili man siya mokuyog mao ‘tong akong gikuyogan ang biktima,” dugang tubag sa gireklamong pulis nga nakahinabi sa telepono sa The Freeman/Banat News.

Si Gillamac miingon nga gusto niyang mahibaw-an kinsay nagtug-an sa tinuod sa duha, matud niya di siya magpanuko pagdisiplina sa mga badlungong polis. “As much as possible we want our policeman to be disciplined and I will not tolerate any illegal activities or binuhatan nga wa masubay sa atong advocacy,” matud pa ni Gillamac. Ang maong kaso gipiyal na ni Gillamac sa Provincial Investigation Detection and Management Branch nga mao’y mo-imbestigar sa maong reklamo. – /EIM) (BANAT NEWS)