Lawas sa policewoman ugkaton sa NBI

CEBU, Philippines – Ang National Bureau of Investigation (NBI-7) mopahigayon og re-autopsy sa patay nga lawas ni Police Officer 1 Heidi Garcia, ang pulis nga namatay human giingong naghikog.

Gibutyag sa Assistant Regional Director sa NBI-7 Atty. Dominador Cimafranca nga subling mibalik sa ilang buhatan ang kabanay sa namatay nga pulis ug mi-request alang sa re-autopsy sa patay’ng lawas niini.

Gilubong na sa Talibon, Bohol si PO1 Garcia ug gikatakdang ugkaton sa NBI ang lawas sa pulis alang sa himuon nga re-autopsy.

Matud ni Cimafranca ang trajectory sa bala nga mipatay  kang PO1 Garcia maoy ilang sutaon.

Sa gihimong imbestigasyon sa kapulisan, giingong naghikog si PO1 Garcia gamit ang service firearm sa iyang higalang pulis si PO1 Cyrelle Marie Bayate. Daan na usab nga miingon ang pamilya ni Garcia nga dili sila motuo nga kini naghikog hinungdan nga gusto nilang masayran ang uban pang panghitabo ug posibilidad nga maoy hinungdan sa kamatayon sa pulis.

Ang NBI-7 nanghinaot nga napreserbar pa sa kapulisan ang mga sapot nga gisuot sa duha ka mga babayeng pulis ug uban pa nga ebidensiya dihang nahitabo ang insidente niadtong Nobiyembre 7 ning tuiga.

Gipaabot nga posibleng mopahigayon og reenactment ang NBI kun gikinahanglan sulod sa lawak ni PO1 Bayate diin matud pa naghikog si PO1 Garcia. – /EIM) (BANAT NEWS)