South African, ginang gikuotan

CEBU, Philippines – Naaktohan sa kapolisan ang usa ka mangunguot nga mikuot sa pitaka sa usa ka South African niadtong Domingo sa kadlawon sa Mango Square, siyudad sa Sugbo.

Usa ka Jonathan Tabillon, 32-anyos, ulitawo, taga Basak-San Nicolas kinsa naaktohan nilang PO1 Santos Catipay Jr. ug PO1 Jonas Ricaplaza nga nikuot sa pitaka sa biktima nga may sulod P15 mil ug hotel room card.

Ang biktima nga usa ka software engineer nailhan nga si Veroon Budhai, 28-anyos nga lalaki ug kasamtangang nagpuyo sa Waterfront Cebu City Hotel sa Lahug.

Ang biktima naghuwat unta og taxi cab dihang gikuot ang iyang pitaka.

Kasamtangang gibalhug si Tabillon sa Police Station 2 (Fuente Osmeña) samtang naghuwat sa ipasaka nga tukmang kaso batok kaniya.

Sa laing bahin, usa ka ginang ang nangayo og tabang sa Mambaling Police Station human nabiktima sa usa ka mangunguot sulod sa jeep niadtong Domingo sa buntag.

Giila ang biktima nga si Emma Sultan Omar, 27-anyos, taga Kinasang-an, Pardo, siyudad sa Sugbo.

Nahitabo ang pagpangawat sa may Cabreros, Basak-San Nicolas samtang nagsakay sa jeep ang biktima.

Nakuha sa kawatan gikan sa bag sa biktima ang P40 mil nga balor sa kwarta nga giputos pa og scarf ug dali kining nisibat.

Nailhan sa biktima ang suspek pinaagi sa rouge gallery sa kapolisan.

Nailhan ang suspek nga si Isidro Sarilrex, taga Cagayan de Oro. – /GMR) (BANAT NEWS)