NPA miatake, 3 ka sibilyan naangol
CEBU, Philippines - Tulo ka sibilyan ang nangaangol human gilabay og granada ug girapido sa mga gidudahang mga sakop sa New People's Army (NPA) ang usa ka military detachment sa Masbate.
Sa report sa Philstar.com, sumala pa ni Clint Antipala, public affairs officer Philippine Army 903rd Brigade, miingon nga usa sa mga biktima ang 15-anyos nga estudyante.
Gibanabanang 20 ka rebelde ang miatake sa usa ka temporary patrol base sa 93rd Division Reconnaissance Company sa Sitio Guiwanon sa barangay Danao diha sa lungsod sa San Jacinto, Masbate.
Nasayran nga ang mga biktima mga sibilyan nga naghakot og kopras nga igo lang milabay sa maong detachment dihang gisugdan sa NPA ang pag-atake.
"They were near the detachment and were hit by an M203 grenade and bullets coming from the NPAs," matud pa ni Antipala.
Dihang nanukol ang mga sundalo daling nangikyas ang mga rebelde, wala’y naigo o namatay sa habig sa mga sundalo apan gituohang dunay daghang nasamdan sa mga rebelde apan nadala nila kini sa pag-ikyas. (BANAT NEWS)
- Latest
