Gub-on na ang karaang merkado sa Mandaue

CEBU, Philippines - Ang salin sa sunog sa karaang merkado sa Mandaue nga nahimutang likud nga bahin sa simbahan gub-on na g’yud aron nga dili makahatag og peligro ingon man mahawan ang mao nga dapit.

Si Market Administrator Mosuline Suliva miingon nga pagahimoon ang pagpaguba ug paghawan sa maong luna aron kasugdan na usab unya ang pagtukod sa bag-ong merkado.

Matud ni Suliva nga ang Police Station 1 sa Mandaue City Police Office (MCPO) nga nahimutang sa ikaduha nga andana sa merkado nga wala maapil pagkasunog gipangitaan karon og laing lugar nga kabalhinan.

Sumala pa ni Suliva nga gitan-aw sa mga sakop sa technical working group sa maong proyekto nga ang Police Station-1 adto usa ipahimutang sa bag-ong gitukod nga barangay hall sa Mantuyong nga pagka karon hapit na mahuman.

Si Mayor Jonas Cortes mitahas sa mga sakop sa technical working group nga mohimo’g nindot nga desinyo sa pagatukoron nga bag-ong merkado publiko sa dakbayan. (BANAT NEWS)