Eleksyon sa SK kinahanglang madayon

CEBU, Philippines - Kusganong giduso sa Akbayan Partylist ang Sangguniang Kabataan (SK) Elections nga mahinayon sa gitakdang petsa bisan nagpadayon pa ang diskurso sa pagpahunong niini.

Kini human gipirmahan ni Presidente Benigno "Noynoy" Aquino III ang "Republic Act 10632” nga nag-oktaba sa  piniliay sa SK gikan Oktubre 2014 hangtud Pebrero 2015.

Matud ni Lester Ouano, vice-chairperson sa Akbayan Youth nga daghang isyu ang mitumaw kabahin sa SK eleksyon apan padayon kini nilang suportahan.

Sigon pa ni Ouano nga ang pagpadayon sa SK maoy usa sa mga paagi nga makapanginlabot ang kabataan sa mga panghitabo sa katilingban.

"Nindot og tumong ang SK apan naa lang gyud mga officials nga gamiton sila, mao na atong i-fight to change it to a better one," asoy ni Ouano, kalabot sa mga politiko nga migamit sa SK sa ilang kaugalingong mga interes.

Matud pa niya, ilang himuon ang tanan aron lang mahinayon ang maong eleksyon.  (BANAT NEWS)