Rabies sa Sugbo mikunhod
CEBU, Philippines - Mikunhod ang gidaghanon sa iro sa probinsiya sa Sugbo nga dunay rabies niining tuiga kun itandi sa milabay’ng tuig.
Si Leah Cayetano, Agricultural Technologist sa Provincial Veterinary Office (PVO) nangangkon nga epektibo ang ilang kampaniya batok sa rabies sama sa information and education campaign batok sa rabies.
Kaabag sa PVO ang mga lokal nga kagamhanan sa probinsya sama sa pagpamakuna ug information drives. Ilaha usab gipangusgan ang paghipos sa mga libud-suroy nga mga hayop sama sa iro ug iring.
Base sa talaan sa PVO, sa nakalabay nga tuig nakatala sila og 42 ka iro nga dunay rabies, 31 niini gikan sa urbanized cities sa Mandaue, Lapu-Lapu ug Cebu City.
Niining tuiga gikan sa buwan sa Enero hangtud sa Oktubre dunay 152 ka ulo sa iro ang napaubos sa eksaminasyon ngadto sa Regional Animal Disease Diagnostic Laboratory (RADDL) diin lima lang niini ang positibo sa rabies.
Si Cayetano mipasabot nga ang mga iro nga nakapaak kinahanglang putlan og ulo kun mamatay aron ma-eksamin, kinahanglan usab nga magsuot og proteksyon ang maghimo niini aron di matakboyan sa rabies ug kinahanglang i-preserve ang ulo atol sa pagdala niini sa PVO. (BANAT NEWS)
- Latest
