Una’ng 200 ka pamilya makapahimulos sa CMP

CEBU, Philippines - Gipaspasan sa Housing and Urban Development Office (HUDO) ang pagkompleto sa mga gikinahanglang dokumento sa 6.5 ka ektarya nga relocation site sa barangay Paknaan, dakbayan sa Mandaue sa paghatag og higayun sa mga beneficiaries nga katabangan sa Community Mortgage Program (CMP) alang sa  pagpatukod sa ilang mga balay.

Si Tony Pete Juanico, pangulo sa HUDO, miingon nga sa 1,200 ka beneficiaries, unang makapahimulos sa programa ang 200 ka pamilya.

Gipasabot ni Juanico nga ilang gipaningkamutan ang paghingpit sa tanan nga gikinahanglang dokumento sa nasudnong kagamhanan ubos sa Abot Pabahay Program.

Si Ana Oliveros sa CMP nga nakigtagbo sa mga presidente sa mga kahugpungan sa urban poor sa dakbayan miingon nga ang maong programa nga ilang kapahimuslan mao ang Site Development and House Construction Materials Loan.

Dugang pa niya nga mokabat sa P250 mil nga kantidad ang mahimong utangon sa mo-qualify nga beneficiary alang sa lot acquisition nga P100 mil, site development nga P30 mil ug house construction materials nga nagkantidad og P120 mil. (Romeo T. Limpangog/GMR)(BANAT NEWS)