P11 mil nga luy-a gikawat
CEBU, Philippines - Nasikop sa mga barangay tanod ang usa ka lalaki nga naaktuhan nga nikawat sa kapin sa 90 kilos nga luy-a nga mobalor og kapin sa P11 mil sa Gaas, lungsod sa Balamban niadtong Huwebes sa kadlawon.
Ang suspek nga si Carlito Son, 28, residente sa maong lugar, gisumbong sa usa ka concerned citizen ngadto sa mga tanod sa barangay sa pagpangawat og luy-a sa usa ka tanuman sa maong lungsod.
Sa pag-abot sa mga tanod, naaktuhan si Son nga nag-alsa na sa sinakong luy-a ug padulong na mosibat hinungdan nga siya gidakop.
Sumala sa kapolisan sa Balamban nga si Son suspek na sa pagpangawat sa susamang tanuman kaniadto.
Matud pa nga ibaligya unta sa suspek ang mga nakawat nga luy-a nga nagkantidad og P120 matag kilo sa mga mangomprahay sa dakbayan Sugbo. (Jean Lumapas, USJ-R Masscom Intern/GMR)(BANAT NEWS)
- Latest
