May utang sa drugas gipatay

CEBU, Philippines - Usa ka lalaki nga gidudahang nalambigit sa ginadiling drugas ang gipusil-patay sa duha ka wala mailhing tawo diha sa Sitio Kulo, Barangay Pajac dakbayan sa Lapu-Lapu.

Matud ni Police Officer 2 Joseph Rouel Cutanda sa Lapu-Lapu City Police Office sa Homicide Section, ang biktima mao si Ronell Lumongsod, 32, residente sa mao nga dapit. Base sa imbestigasyon, mao pay pagbiya sa amigo niini nga si Jovencio Santillan sa ilang gilingkoran kay dunay paliton sa tindahan dihang miabot ang duha ka lalaki ug miduol sa biktima dayong pusil kang Lumongsod.

Nakadagan pa si Lumongsod apan gigukod kini ug gitiwasan, patay na kini dihang naabtan ni Santillan nga daling mibalik sa agi. Sa dugang nga pakisusi sa kapolisan, giingong may kalambigitan sa ilegal nga drugas ang biktima ug gibaharan na kini ug ang iyang pamilya nga patyon tungod sa utang niini sa drugas sa gihinganlan og "Kino."

Nasayran usab nga ang Rusi nga dunay temporary plate #7C 4820 nga iya sa biktima giingong gihimong collateral ngadto ni "Kino" tulo ka semana na ang milabay.

Padayon karon ang imbestigasyon sa kapolisan ug gipangita ang mga responsable sa maong krimen.  (BANAT NEWS)