CIB andam kun ikiha

CEBU, Philippines - Andam ang hepe sa City Intelligence Branch sa Cebu City Police Offce (CCPO) nga moatubang kun moreklamo ang pamilya sa napatay nga mga lalaking giingong nakigpinusilay kanila.

Si Superintendent Romeo Santander, ang hepe sa CIB miingon nga igo ra silang nanalipod sa ilang kaugalingon dihang gipamusil sila nila ni Dean Mark Rivera, alyas Sadam  ug alyas Jay-ar nga nailhan na nga si Ebaresto Itang, 23, taga Sitio San Antonio, Binabag dakbayan sa Bogo. Nakasabot si Santander sa gibati sa pamilya sa duha apan kini mipasabot nga igo lang mibalos ang iyang mga sakop sa pagpusil sa duha sa mga polis.

Nasayran nga modangop sa Commission on Human Rights (CHR) ang pamilya sa nakalas.

Gihimakak niya nga na-pressure sila sa mga tulis nga nahitabo sa dakbayan mao nga ilang gipasanginlan ang maong mga lalaki.

Matud niya mismo ang Mandaue City Police Office mikompirmar nga nalambigit ang duha sa mga krimen sa Mandaue. Kagahapon, gipasakaan og kaso ang naangol nga si Joseph Cueva.  (BANAT NEWS)