Suway pagtulis naatlan sa sakop sa SWAT
CEBU, Philippines - Napakgang ang tinguha untang pagpanulis sa duha ka armadong lalaki nga nagsakay og motorsiklo dihang naatol nga dunay miagi nga sakop sa Special Weapon and Tactic (SWAT) sa Mandaue City Police (MCPO) sa dalan M.C. Briones Barangay Maguikay, Dakbayan sa Mandaue.
Matud pa ni Senior Police Officer 1 Renato Canja sa kapolisan sa Presinto 4 gibabagan ug gipusil sa duha ka armadong tawo ang Toyota Hilux ni Gery John Cañete, 35, nga ilang gibabagan.
Gidudahan nga tulison o ba kaha adunay dautang tuyo ang mga criminal ngadto sa biktima apan swerte nga naagian kini ni Police Officer 2 Felonilo Seno Jr. ug daling miresponde.
Si Seno sakop sa MCPO-SWAT padung na mo-duty dihang nakadungog kini og buto sa armas hinungdan nga mihunong siya ug gisusi diin kini naggikan.
Matud pa nakit-an niini ang duha ka mga lalaki nga nagtion og armas kang Cañete hinungdan nga iyaha kining gisitar ug nagpailang usa siya ka polis, dihadiha mikaratel og balik sa motorsiklo ang mga lalaki ug mipabulhot palayo.
Daling gidala si Cañete sa buhatan sa kapolisan aron kuhaan og pamahayag. Gisusi na sa mga imbestigador kun si kinsa ang duha ug ang motibo sa maong pagpangatang. (BANAT NEWS)
- Latest
