Anak gilambayog

CEBU, Philippines - Usa ka inahan ang gidakop human nga giingong gilambayog niya ang iyang kapin sa usa ka tuig pa nga anak nga nangayo og pagkaon kay gigutom tungod sa kalagot nga nadisturbo kini sa pagkatulog.

Ang 18-anyos,  naghilak nga miatubang sa mga tigbalita ug mibutyag sa nahitabo.

Matud pa sa inahan nga siya ug ang iyang anak nga nagtupad og higda dihang gipukaw siya sa iyang manghod nga lalaki kay nasuko kini kay wala siya nakapaninda.

Dugang pa sa inahan sa iyang kasuko iyang nalabay ang bata ug didto kini miigo sa tumoy sa migimaw nga dos por dos sa pultahan hinungdan nga nakaangkon og samad sa agtang ang bata ug wala na matabang.

Giklaro sa inahan nga wala siya’y kalagot sa iyang anak apan didto siya nasuko sa iyang igsuon kay matud pa gibunalan siya og tualya dihang gipukaw.

Ang maong pamahayag sa inahan gidasunan usab sa 73-anyos nga kanhi niini kaipon. Kini miasoy nga wala g’yud tuyoa sa inahan ang paglabay sa iyang anak dungan sa pag-ingon nga pinangga g’yud niini ang bata.

Apan ang maong mga pamahayag sa duha gihimakak sa igsuon sa suspek.

 Sigon pa sa manghod  iresponsable nga inahan ang suspek kay  sige niining biyaan ang iyang anak kay molaag og gabii ug buntag na mopauli.

Matud pa niya nga gipukaw  niya kini  aron sa pagpakaon sa bata kay udto na ug nagsige na og hilak.

Si Police Officer 2 Camia Codo sa WCPD sa Carcar Police Station mibutyag nga pasakaan nila og kasong parricide ang inahan.

Matud pa sa pulis nga dili sila kasulti  kun dunay deperensiya sa panghuna-huna ang inahan apan iyang gitataw nga bisan og wala pa gituyo ang insidente apan di gihapon kini mahimong rason aron di pasakaan og kaso ang inahan.

Apan alang sa apohang babaye sa bata,  kun siya ang pabut-on dili na lang pasakaan og kaso ang suspek tungod kay aksidente man ang nahitabo. (BANAT NEWS)