Nameke sa pirma sa namatay na napriso

CEBU, Philippines – Gihukman nga mabilanggo sa tulo ka tuig ang duha ka babaye gumikan sa pagmao-mao sa pirma sa gibaligya nga yuta sa tag-iya nga patay na.

Gikombikto ni Municipal Trial Court in Cities (MTCC) Judge Oscar Andrino sila si Myrna Fabroa ug Luisa Gensis sa kasong pangopya sa pirma sa usa ka Geronimo Genon nga nibaligya sa 4,293 metro kwadrado nga luna sa barangay Linao, dakbayan sa Talisay.

Nasuta nga wala’y kalabutan si Genon sa pagpirma sa Deed of Absolute Sale sanglit patay na kini niadtong tuig 1994.

Niadtong tuig 2001, giingong niadto sila si Fabroa, Gensis ug usa ka Virginia Cabayas sa panimaly sa asawa ni Genon nga si Silveria ug nitanyag nga tabangan sa pagbaligya sa maong luna. Gihatag ni Silveria ang orihinal nga kopya sa titulo sa yuta ngadto kang Fabroa kinsa nisaad nga iuli apan pakyas human sa pipila ka buwan. Nasayran nalang ni Silveria sa Talisay City Assessor’s Office nga nabaligya na ug gimao-mao sa mga akusado ang pirma sa iyang bana.

Si Gensis ang gitumbok nga nimaneho sa pagpakanselar sa deklarasyon sa yuta ni Silveria ug gibalhin sa pangan sa bag-ong tag-iya.

Gihimakak sa mga akusado ang pasangil apan ang desisyon ni Andrino pabor kang Silveria samtang nakalingkawas sa kaso si Cabayas kinsa unang gilakip sa gikiha. – /EIM) (BANAT NEWS)