2 patay sa shootout

CEBU, Philippines – Patay ang duha ka lalaki, samtang naangol ang ilang usa ka kauban human gikatahong nakigpinusilay sa kapulisan gikan sila milikay sa checkpoint sa  N. Bacalso Ave. ug eskina sa Leon Kilat ning dakbayan sa Sugbo.

Ang duha ka namatay mao sila si Dean Mark “Sadam” Rivera ug usa ka naila lang sa pangalang Jay-ar, samtang ang naangol naila mao si Joseph Cueva, 26, duna’y ka live-in nga pulos nagpuyo sa Upper Casili, Mandaue City.

Matud pa sa hepe sa City Intelligence Branch (CIB) sa Cebu City Police Office (CCPO), Superintendent Romeo Santander nga nahinabi sa Banat News nataymingan nga ilang nasundan ang duha ka motorsiklo nga gisakyan sa tulo.

Sigun pa ni Santander nga nakadawat sila og tawag sa radio bahin sa duha ka motorsiklo nga milikay sa checkpoint nga Police Station 6 hinungdan nga ilahang gigukod ang mi-overtake kanilang mga motor. Gikatahong kalit pa nga mi U-turn ang duha ka motorsiklo ug hapit pa mabanggai ang sakyanan sa CIB ug pagkahuman mipabulhot og padagan.

Atol sa ginukoray sa kapulisan didto sa ma’y C. Padilla Street, Mambaling naabtan si Cueva ug napusilan sa iyang tiil, samtang ang laing motorsiklo naapsan sa  South Road Properties duol sa  Plaza Sugbo apan giingong nakigpinusilay sila sa mga polis hinungdan nga sila napatay.

Ang imbestigador sa Homicide Section sa Cebu City Police Office nga si Senior Police Officer 1 Ruth Violango nga nahinabi sa Banat News mitug-an nga pulos armado og revolver ang tulo. Midugang si Violango nga ang usa sa mga napatay nagsapaw og sinina. Ang rebolber nga nakuha kang Cueva ug sa napatay nga si Jay-ar adunay mga basiyo sa mga tambor, apan ilaha pa silang ipaubos sa paraffin test aron matino kun nakapabuto ba sila og armas.

Ang hepe sa Cebu City Police Office (CCPO) nga si Senior Superintendent Noli Romana mibutyag nga ang mga intelligence operatives sa dakbayan sa Mandaue mikompirmar nga nalambigit na sa mga ginagmay nga tulis ang mga napatay. Apan si Cueva mihimakak nga duna kini armas ug namusil siya sa mga pulis. Matud niya gikan sila sa Labangon mitambong sa haya sa iyang apohan ug milikay siya sa checkpoint kay wala’y rehistro ang dala niini nga motorsiklo. Matud niya wa say lisensya ang iyang mga kauban pagmaneho mao nga namalik sila sa agi apan gigukod sila sa mga polis. – /EIM) (BANAT NEWS)