Moalboal police may lapso–Bañas
CEBU, Philippines – Dunay nakita nga lapso ang hepe sa Police Regional Office-7 atol sa gihimo nga drug raid operation sa kapulisan sa Moalboal nga misangpot sa kamatayon sa duha ka pulis nga gipamusil sa wala pa mailhing gunman.
Matud ni Chief Superintendent Prudencio Tom Bañas dili g’yud angay nga mokompyansiya panahon sa drug operation kay dunay posibilidad nga manukol ang mga target.
Dugang pa sa opisyal nga nindot na unta ang nahimong kalampusan sa Moalboal Police apan daw sa miluag ‘sab ang ilang seguridad.
“We should always be on guard, huwag tayong pakaang kaang, kasi ibang klase ‘to, druga ‘to. Be more circumspect in your security arrangement,” dugang pasabot ni Bañas.
Gipaabot na lang sab ni Bañas ang kompletong report sa maong hitabo gikan sa hepe sa Cebu Provincial Police Office (CPPO) Senior Superintendent Noel Gillamac aron basehan paghimo og kausaban sa ilang mga pamaagi sa operasyon.
Uyon sab si Bañas nga himoon na lang sa buntag ang tanan nga drug raid operation sa kapulisan, apan si Gillamac miingon nga iya na lang isalig sa chief of police sa matag lungsod ang paghimo sa operasyon.
Dili usab uyon si Bañas sa mga sugyot nga momando og “shoot to kill” batok ni Michael Aquino nga subject sa maong raid apan mipasidaan nga dili lang hatagan ni Aquino og rason ang mga polis nga kini pusilon kun sa higayon nga ilaha kining maapsan.
Samtang, duha ka mga tawo ang mitahan may labot gihapon sa maong drug raid ug padayong giimbestigar sa kapolisan.
Misaad ‘sab og tabang pinansiyal ang mga opisyal sa kapulisan apil ‘sab si Gob. Hilario Davide III ngadto sa pamilya sa mga namatay nga pulis. – /EIM) (BANAT NEWS)
- Latest
