Misis sa kagawad naghikog
CEBU, Philippines – Napalgang nagbitay ug wa nay kinabuhi ang usa ka 49- anyos nga asawa sa usa ka kagawad sa barangay human giingong naghikog tungod sa selos sa Purok Inyang 2, Barangay Punod , Pinamungajan.
Patay nang nadangat sa tambalanan ang ginang (pangalan gipugngan sa Banat News) human kini matangtang gikan sa gibitayan niyang pisi nga nylon sud sa ilang balay.
Matud ni Police Officer 2 Ariel Taguiam, desk officer sa Pinamungajan Police Station sa wala pa mapalging patay ang ginang, nagkalalis ang magtiayon nianang hapon.
Giingong nagduda ang ginang nga adunay laing babaye ang iyang bana nga kagawad sa barangay. Human sa ilang panaglalis, nilakaw ang kagawad kay motambong sa sesyon sa barangay.
Ang ilang anak nga babaye miadto sa Pinamungajan Public Market aron mangompra ug nahibilin ang inahan niini nga nag-inusara sa balay.
Apan nakugang na lamang kini sa pag-uli gikan sa merkado nga nagbitay na ang iyang inahan sud sa lawak sa iyang mga ginikanan.
Daling gidala sa iyang mga silingan ang ginang sa Pinamungajan Medical Center apan gideklarar na kining Dead On Arrival. – /EIM) (BANAT NEWS)
- Latest
