Visayan Sea ipadeklarar nga protected area
CEBU, Philippines - Upat ka gobernador sa Kabisay-an lakip si Cebu Gov. Hilario Davide III ang nanawagan kang Presidente Benigno Aquino III pagdeklarar sa Visayan Sea Triangle isip protected area.
Sa usa ka resolusyon nga gipagawas sa mga gobernador, buot nila nga dili na pasudlan og mga mananagat ang kadagatan sulod sa 15 kilometrong dagat gikan sa kabaybayonan sa mga munisipyo ug mga siyudad sa ilang mga probinsya.
Sumala pa sa report sa Interaksyon.com, ang mga gobernador nagkauyon niini atol sa 6th Visayan Sea Summit nga gihimo sa Museo Sang Bata sa Negros Occidental niadtong adlaw nga Biyernes.
Ang mipirma sa resolusyon mao sila si Gobernador Alfredo Marañon Jr. sa Negros Occidental, Arthur Defensor Sr. sa Iloilo, Rizalina Seachon-Lanete sa Masbate, ug Davide, nga girepresentahan ni Ricardo Lachica.
"We want to establish the entire Visayan Sea as the biggest marine protected area in the Philippines, ensuring that the biodiversity and marine life will be protected for generations to come," sumala pa sa upat.
Gawas niini, ila usab giawhag ang nasudnong kagamhanan nga dili lang maoy manguna sa maong lakang, kundili, magbutang g’yud sila og mga sakop, pundo ug himuon kining prayoridad sa tagsatagsa nila ka mga departamento.
Ang maong lakang nagtinguha nga mapanalipdan ang mga gagmay nga mananagat tungod kay did-an na ang mga dagkung panagatan nga makapanagat kinse kilometros gikan sa kabaybayonan sa 23 ka local government units nga nasulod sa Visayan Sea Triangle.
Gihagit ni Marañon ang Bureau of Fisheries and Aquatic Resources (BFAR) nga mohimo og hiniusang polisiya aron protehian ang Visayan Sea tungod kay kun maayo ang pagtagad niini, makapakaon kini sa tibuok nasud ug bisan na mga silingang nasud sa Asya.
Gipatuman na sa BFAR ang fishing ban sa tulo ka matang sa mga isda nga makuha sa kadagatan sa Visayan Sea, gikan sa Nobiyembre hangtud Marso sunod tuig diin gidili ang pagpanagat sa mga isdang tamban, sardinas, mackerel ug mga kaliwat niini aron makapangitlog og daghan ang isda sunod buwan. (BANAT NEWS)
- Latest
