Barangay hall, police station ipaguba

CEBU, Philippines - Gikatakdang ipaguba ang mga ilegal istraktura nga nakalapas sa three-meter easement sa mga kanal o mga sapa sa dakbayan sa Mandaue nga maoy gipasanginlang hinungdan sa pagbaha.

Si Mayor Jonas Cortes miingon nga naglakip na sa gitakdang ipaguba mao ang Barangay Hall sa Tipolo nga nagtungtong gyud sa sapa.

Matud ni Cortes nga hapit na mahuman ang gitukod nga bag-ong Barangay Hall sa Tipolo.

Lakip sa ibalhin sa kagamhanan sa maong dakbayan ang Presinto 5 sa Mandaue City Police Office (MCPO) sa Barangay Opao nga nagpatong usab sa kanal sa maong lugar.

Gipangitaan pa og lugar nga kabalhinan sa Presinto 5 sama sa barangay Looc ug Umapad.

Gitataw ni Cortes nga dili lang mga pribado nga istraktura nga nakalapas sa three meter easement sa sapa ang ilang ipaguba kun dili lakip na usab ang gipanag-iya sa gobiyerno.

 Sa nasayran nga 300 kapin ka pamilya sa Mahiga Creek sa sitio Mahayag ug sitio Mahusay sa Subangdaku ang naapektohan sa pagpangguba sa ilang kabalayan nga nakalapas sa three-meter easement.  (BANAT NEWS)