Balay gisunog sa anak sa tag-iya
CEBU, Philippines - Naugdaw ang usa ka panimalay nga ginama sa mixed material sa Barangay Guinsay, Dakbayan sa Danao human giduslitan sa anak sa tag-iya niini.
Si Police Officer 2 Ronaldo Gomez sa Danao Police Station miingon nga gitanggong karon sa karsel ang suspek nga si Romilo Almeres Capuyan, 24.
Matud pa ni Gomez nga ilang gidakop si Capuyan human nagpatabang kanila ang inahan niini nga si Aida, 48, tungod sa pagsunog niini sa ilang balay.
Wala pa masuta kun unsa ang hinungdan sa kasuko sa suspetsado ngadto sa iyang mga ginikanan aron iyang sunogon ang ilang balay.
Subay sa gihimong pakisusi sa kabomberohan, mokabat P500 mil ang gibiling danyos sa sunog wala pay labot sa mga gamit nga naapil og kaabo.
Walay nakalas o naangol atol sa maong hitabo ug kasong arson ang ilang ipasaka batok sa maong suspetsado. (BANAT NEWS)
- Latest
