Kanhi bise mayor gipriso

CEBU, Philippines - Gitanggong sa Fuente Police ang kanhi bise mayor sa lungsod sa Sogod human kini gireklamo nga mihimo og kasamok sa P. Del Rosario Street, Sambag 1, ning dakbayan sa Sugbo.

Ang gireklamo ug gitanggong sa kapulisan naila nga si kanhi bise mayor Dean Dosado, 52, minyo ug lumad nga taga Sto. Niño, Poblacion, Sogod.

Samtang ang mireklamo kanila naila nga si Johnson Clark Gayrosaga, 29, nagpuyo sa lugar nga nahitaboan.

Apan ang abogado ni Dosado nga si Atty. Junjie Manda nga nahinabi sa Banat News mireklamo nga nabali na hinuon ang nahitabo sa iyang kliyente. Sumala pa sa nakuha nga impormasyon sa Banat News nga igo lang misukol si Dosado human nga unang giunhan sa grupo sa reklamante.

“Ang nahitabo nabali na hinoon, we were the one’s complaining about the threat,  ang nahitabo hinoon,  ilang gipriso ang akong kliyente on the act lang kuno nga nakit-an nila didto nga duna’y allegation nga naguba ang pultahan,” matud pa ni Atty. Manda.

Gikwestiyon ni Manda kun nganong gidiretso og sikop si Dosado nga unta  i-agi lang kini una sa barangay aron didto na mahusay.

“We question the legality of the arrest , if we can prove that  there is a violation or illegal ang ilang gibuhat we will file a case against them for arbitrary detention,” pasabot pa ni Manda.

Apil ‘sab sa gireklamo sa abogado nga dunay usa ka pulis sa Fuente Police Station nga mituok ni Dosado ug mao’y mipugos sa pagpasulod sa kanhi bise mayor sa bilanggoan.

Ang hepe sa Fuente Police nga si Chief Inspector Wildemar Tiu mitug-an nga unang mitawag ug nagpatabang kanila ang grupo ni Dosado tungod sa pagpanghulga ni Gayrosaga nga sunogon ang balay.

Apan matud pa ni Tiu nga pag-abot sa iyang mga sakop sa lugar uban ang mga sakop sa MPG, si Dosado maoy ilang naabtan nga nanghasi sa lugar hinungdan nga mao kini ilang gisikop. (BANAT NEWS)