Magpale gusto’ng pasidunggan

CEBU, Philippines - Si Vice Governor Agnes Magpale gituboy sa Inter-Agency Council Against Trafficking (IACAT) nga ideklarar nga kampeyon batok sa trafficking in person, ilabi na sa kampanya batok sa pagpangabuso sa kababayen-an ug kabataan. Adunay nagpadayon nga national search for outstanding individuals nga ang pagpasidungog adto himoa sa Manila karong Disyembre 12 atol sa pagsaulog sa International Day Against Trafficking.

Ang IACAT-Central Visayas nga mi-nominate ni Magpale gipangulohan ni Regional State Prosecutor Fernando Gubalane nga midayeg sa kasensiro sa bise gobernador sa kampanya batok sa human trafficking.

Naila si Magpale sa iyang adbokasiya sa katungod sa kabataan ug kababayen-an mao nga napilian siya nga nominee sa IACAT Central Visayas.

Isip magbabalaod, si Magpale naninguha nga ma-institutionalize ang Committee on Women, Children and Family sa Sangguniang Panlalawigan ug siya usab ang miumol sa ordinansa kabahin sa Provincial Women’s Commission nga nagsilbi’ng gaway sa pag-implementar sa mga programa ug proyekto alang sa kababayen-an.

Si Magpale nagsugod sa iyang adbokasiya sa pagpanalipod sa katungod sa kababayen-an dihang board member pa siya ug gimugna usab niya ang ordinansa kabahin sa Mandatory Registration sa tanang matang sa Recruitment and Placement Activities sa barangay level ug ordinansa nga nag-ban sa Linggam ug Yoni massage.

Dili pa lang dugay, duha sa iyang ordinansa sa cyberpornography ug anti-obscenity ang gi-review pa sa Committee on Laws sa Sangguniang Panlalawigan.

Sa laing bahin, ang kagamhanan sa probinsiya migahin og P10 milyones nga budget alang sa Crisis Center for Women and Children diha sa Barangay Kalunasan, dakbayan sa Sugbo. Si Magpale nga maoy co-chairman sa Provincial Commission for Women and Children (PCWC) nagkanayon nga paningkamotan nila nga masugdan na sa sunod tuig ang katukoran sa maong proyekto.

Lakip sa pagatukoron nga crisis center mao ang livelihood center alang sa kababayen-ang gipang-abusohan.

Pagka karon, ang uban sa mga bata nga biktima sa pagpangabuso anaa usa gipahiluna sa pasilidad nga gidumala sa non-government organization (NGO) apan gitabangan gihapon sila sa Kapitolyo.  (BANAT NEWS)