Pito ka pushers na buy-bust
CEBU, Philippines - Pito ka suspetsado nga pushers nasikop sa kapolisan sa managlahi’ng anti-illegal drug operations sa lalawigan sa Sugbo kaniadto’ng Biyernes.
Si Roberto Lubon, 42, taga Barangay Sto. Rosario, Bogo City nasikop sa gipahigayong buy-bust operation ug nasakmitan siya’g duha ka pakete nga shabu.
Samtang nadakpan usab sa kapolisan si Silverio Pacris, 36, atol gihapon sa laing buy-bust operation didto sa South Poblacion, San Fernando kaniadto’ng Biyernes sa buntag. Nasakmit sa kapolisan ang 22 ka gamay nga pakete sa gituohang shabu, lakip na ang P600 nga kwarta nga apil ang P500 nga marked money.
Didto sa Minglanilla, si Samuel Calinawan, 35, taga Barangay Tunghaan, nasikop usab sa kapolisan Biyernes sa gabii ug nakuhaan og pito ka gagmay nga pakete sa gituohang shabu.
Ang mga dinakpan gidala sa police stations sa mao nga mga lungsod ug giandam na ang kaso nga ipasaka batok kanila adto sa hukmanan ugma’ng adlawa.
Sa dakbayan sa Lapu-Lapu, upat ka tawo, apil na ang duha ka drayber og PUJ, nadakpan ug nakuhaan sila og 25 ka gagmay’ng pakete sa ginadili’ng drugas pinaagi sa laing buy-bust operation nga gihimo didto sa Barangay Marigondon kaniadto’ng Biyernes sa gabii. Ang buy-bust operation gipangulohan ni Senior Inspector Verniño Noserale, hepe sa LCPO-Station 2.
Ang nadakpan mao si Angelo Tavera, 35, nga nakuhaan og 15 ka gagmay’ng pakete sa shabu samtang si Alvin Regnar, 48, taga Sitio Looc, Marigondon nakuhaan ‘sab og pito ka pakete sa ilegal nga drugas.
Naapil pagkasikop sila si Jenon Miano, 48, taga Barangay Gabi, Cordova ug si Rolando Siroy, 39, taga Barangay Gun-ob. Gituohan nga ang duha ka drayber miadto aron mogamit og drugas. (BANAT NEWS)
- Latest
