Busan, sugbo nagbayloay og kawani

CEBU, Philippines - Nagbayloay ang kagamhanan sa Busan, Korea ug Probinsiya sa Sugbo sa pagdestino og kawani.

Kini kabahin sa Public Officers Secondment Agreement tali sa duha ka probinsiya nga gikatakda usab nga magpirmahay og sisterhood agreement.

Si Atty. Ramil Abing, assistant provincial administrator, nibutyag nga si Kim Hee-sun motrabaho sa Kapitolyo sulod sa usa ka tuig sugod karong Enero.

Si Kim Hee-sun nagtrabaho sa buhatan sa Transportation Management Division sa gobiyerno sa Busan ug idestino kini sa Provincial Planning and Development Office (PPDO).

Ang kaswal nga kawani sa Kapitolyo nga si Ivan Mark Abella ang gipadala ngadto sa Busan.

Ang Busan maoy miabaga sa gastohan sa ilang kawani lakip na sa kawani sa Kapitolyo nga gipadala ngadto sa ilang lugar.

Hinuon ang Kapitolyo mihatag og allowance kang Abella lakip sa iyang plete.

Matud ni Abing nga itudlo ni Kim Hee-sun sa mga kawani sa Kapitolyo ang ilang mga pamaagi sa ilang buhatan sa Korea samtang ang iyang makat-onan sa Sugbo iya usab ipaambit ngadto inig balik niya sa ilang lugar.

Mao usab ang buhaton ni Abella inig balik sa Sugbo. (Brenda D. Batuto/GMR)(BANAT NEWS)