Usa patay, lima angol sa aksidente
CEBU, Philippines - Patay ang usa ka 50-anyos nga lalaki human nadasmag sa center island ang gimaneho niini nga motorsiklo sa may Imus New Road ning dakbayan sa Sugbo, niadtong nakalabay nga gabii.
Ang biktima naila nga si Renante Dacayana, nagpuyo sa Tupas Street, Cebu City kinsa gikan pa sa trabaho sa Mandaue City paingon na unta mouli.
Apan pag-abot sa maong lugar nadiretso kini sa center island sa maong lugar ug nilupad hinungdan sa grabeng kadaot nga naangkon sa kalawasan.
Samtang usa ka bus ug usa ka boom truck ang nagbangga sa Sitio Lakaron, Barangay Pitalo lungsod sa San Fernando kagahapon sa buntag nga miangol og lima ka mga tawo.
Ang drayber sa Sunrays Bus mao si Hermolito Pilago, 32, taga Kamburoy, Samboan, samtang ang drayber sa boom truck naila nga si Charles Recaña, 56, nga gikatahong nabalian sa iyang tiil nga naipit human sa panagbangga.
Matud pa ni Chief Inspector Sarah Jean Recla, hepe sa San Fernando Police nga nahinabi sa Banat News nagsugat ang duha dihang milikay sa multicab nga kalit mihunong ang boom truck hinungdan nasampak kini sa bus.
Bugtong ang drayber lang sa boom truck ang nagrabehan. (BANAT NEWS)
- Latest
