CEBU, Philippines - Dugang pundo ang gigahin alang sa mga piniriso sa Cebu Provincial Detention and Rehabilitation Center (CPDRC) sunod tuig.
Sa giduso nga budget ni Gob. Hilario Davide III, ang kasamtangang P70 milyones gihimo kining P87.8 milyones.
Matud ni Danilo Rodas, provincial budget officer, nga ang pagdugang sa budget gumikan sa pagdaghan usab sa mga piniriso.
Sa P87.8 milyones, P52.5 milyones niini alang sa pagkaon sa mga piniriso.
Ang CPDRC nga may kapasidad nga 1,600 ka piniriso apan niabot na sa 2,100 sa pagkakaron.
Matud ni Rodas nga matag inmate adunay budget nga P60 sa ilang kaon matag adlaw.
Gahin nga P3 milyones alang sa dugang selda nga tukuron.
Karong tuiga P36 milyones lang ang budget sa kaon sa mga piniriso.
Si Gobernador Hilario Davide III una na nga nipadayag sa kahuot sa CPDRC ngadto kang Chief Justice Maria Lourdes Sereno sa pagbisita sa Sugbo.
Gihangyo ni Davide nga tabangan sa Korte Suprema nga mahatagan og pagtagad ang kaso sa mga inmates nga mapadali. Dugang ni Davide nga dunay mga inmates nga wala pa gyud mo-irog ang kaso bisan og dugay na napasaka sa korte. (BANAT NEWS)