2,900 ka kahoy ihulip sa 58 nga gipamutol

CEBU, Philippines - Hulipan og 2,900 ka turok sa kahoy ang 58 ka punoan nga giputol sa Naga Central School.

Giawhag sa Department of Environment and Natural Resources ang mga environmentalists lakip na si Fr. Robert Reyes nga mosalmot sa ilang pagpananum og kahoy karong Nob. 21.

Matud ni DENR-7 information officer, Eddie Llamedo, nga ang barangay Lutac ang ilang napili ug sa kagamhanan sa dakbayan sa Naga nga maoy tamnan sa mga turok sa kahoy.

Uban sa mananum ang mga tinun-an ug mga pribadong indibidwal.

Ang balaud nagmando nga ang public area nga putlan og punoan sa kahoy kinahanglan nga pulihan og 50 ka mga liso matag usa ka punoan.

Ang kagamhanan sa dakbayan sa Naga ug ang mga tunghaan ang moatiman sa mga ipang-tanum.

Ang multipartite monitoring team diin lakip si Fr. Reyes ang mo-monitor kun maayo ba ang pagtubo sa mga gipangtanum nga kahoy. (BANAT NEWS)