CEBU, Philippines - Usa ka babaye nga natulog sa ilang balay ang gisaka ug gipusil sa wala mailhing lalaki diha sa Sitio Mowag, Barangay Guadalupe, siyudad sa Carcar, habagatang Sugbo niadtong Martes sa gabii.
Gipusil sa wala mailhing lalaki si Vilma Andales Alcover (dili ang TV reporter), 32, residente sa maong lugar.
Dali siyang gidala sa mga kabanay sa Carcar Provincial Hospital apan gibalhin kini sa Vicente Sotto Memorial Medical Center tungod sa naangkong daghang samad pinusilan sa lawas.
Base sa pasiunang imbestigasyon sa kapolisan, walay kuryente sa maong lugar niadtong orasa mao nga way nakabantay sa pagsulod sa mamumuno.
Wala pa matino kung unsay motibo sa maong krimen, nakuha sa kapolisan gikan sa crime scene ang pito ka kabhang sa kalibre .45 ug duha ka deformed slugs. (BANAT NEWS)