Pabrika sa furniture naugdaw, P1milyon ang danyos

CEBU, Philippines - Pabrika sa pang-export nga furniture ug mga dekorasyon sa balay sa Tungkil, Minglanilla, naugdaw kagahapon sa kaadlawon, usa ka bombero naangol ug nagbilin og P1 milyon nga danyos.

Ang Bon Ace Fashion Tools gipanag-iya sa usa ka Engr. Ramon Bonghanoy gikatakdang mag-deliver sa ilang mga nahuman na nga mga produkto apan naapil kini tanan og kaugdaw.

Nadawat sa Minglanilla Fire Station ang alarma alas 2:35 sa kaadlawon pinangulohan ni Fire Officer 1 Fulbert Navarro.

Samtang ang nakaangkon og minor injuries  mao si Fire Officer 1 Almar Bocado.

Si Navarro sa pakighinabi sa Banat News, miingon nga usa sa ilang gitan-aw nga posibleng mga hinungdan sa sunog mao ang mga kemikal nga gigamit  ug electrical misuse.

Ang pabrika gituohang migamit og chemical sama sa resin ug mga thinners paghimo og fiber glass nga pulos daling masunog.

"Musilaob man gud na basta chemical. Mga paint thinner man kasagaran, basin posible nga ni-spark," sigon pa ni FO1 Navarro.

Ang maong factory ginama sa concrete and steel materials ug nahimutang duol lang sa barangay road ug wa katapon sa kasikbit nga kabalayan. (BANAT NEWS)