Balay sa ex-BOC collector gilabay’g granada

CEBU, Philippines - Balay sa kanhi district collector sa Bureau of Customs (BOC)-7 sa usa ka subdivision sa Bulacao, Talisay City gilabayan og granada  nga wala makabuto.

Wala diha sa balay si Atty. Paul Alcazaren atol sa insidente apan ang iyang caretaker nga si Bentok Castañares maoy nakapunit sa maong granada nga wala nay pin diha sa sud sa compound.

Matud pa ni Police Inspector Wendell Abellana ang deputy chief sa Talisay City Police Office nga nahinabi sa Banat News, miusig ang mga iro alas-3 sa kaadlawon apan wala panumbalinga sa mga katabang.

Apan niana nang pagkahayag, samtang naghinlo ang caretaker iyang nakita ang maong granada hinungdan nga dali kining mitawag sa kapolisan.

Ang Bomb Squad mao nay nikuha sa maong granada nga usa ka MK 2 fragmentation grenade nga naibtan na og pin.

Gipaabot pa sa kapulisan nga makauli gikan nagbakasyon ang abogado aron makuhaan kini og pamahayag sa kapulisan.

Dunay close circuit television (CCTV) ang maong balay ug gisubay pa kung nakuhaan ba og footage ang mga responsable. (BANAT NEWS)