Kanhi bodyguard naghikog; sikyu nagpusil sab sa ulo

CEBU, Philippines – Patay ang usa ka kanhi personal bodyguard sa usa ka director sa National Bureau of Investigation (NBI) nga gituohang naghikog sa gawas sa balay sa gitrabahoan sa iyang kapuyo diha sa may Teresita Village, Barangay Tisa, Cebu City.

Ang naghikog naila nga si Michael Gubalane, 41, walay trabaho ug nagpuyo sa Sitio Lower Sampaguita, Banilad ning dakbayan.

Matud pa ni Police Officer 1 Joel Zamora sa homicide section sa Cebu City Police Office nga nahinabi sa Banat News kini miingon nga miadto si Gubalane sa balay nga gitrabahoan sa kanhi kapuyo nga si Marife Noynang kay gusto kining makigbalik.

Apan giingong dili na g’yud gusto ni Noynang nga makigbalik kay kusog kining manapat hinungdan nga mibalik sa balay sa agalon ang babaye.

Paglabay sa pipila ka minutos,  nakit-an na lang nga nagbitay na sa electrical cord  si Gubalane ug wala nay kinabuhi diha sa gate.

Samtang usa ka security guard nga gituohang naghikog ang nagpusil sa iyang ulo sud sa opisina sa ilang trabahoang mall sa Barangay Pajac dakbayan sa Lapu-Lapu.

Giila ang naghikog nga si Darwin Dagatan, 26, taga Zamboanga City nga nadestino sa RD Manpower Office ug stay-in sa maong dapit.

Nakuha diha sa opisina ang usa ka. 38 caliber revolver duol sa ulo sa biktima nga adunay sulod nga upat ka bala  ug usa ka basiyo, usa ka laptop, duha ka cellphone ug laing duha ka .38 kalibreng rebolber nga walay mga bala.

Gidudahan nga naghikog kini apan wala pa mahibaw-i kung unsa ang hinungdan niini. Si Pantaleon nidugang nga ipaubos og usa ka paraffin test ang nakuha nga pusil atol sa nahitabong insidente. – /EIM) (BANAT NEWS)