Magtiayong Moreno ipasuspenso
CEBU, Philippines – Ipasuspenso gyud sa buhatan sa Ombudsman ang magtiayong Mayor Cynthia ug Bise Mayor Augustus Caesar Moreno sa lungsod sa Aloguinsan.
Kini human gibasura sa Ombudsman ang motion for reconsideration sa magtiayong Moreno sa nahaunang desisyon niadtong Abril 14, 2010 nga nagpahamtang sa pagsuspenso sulod sa unom ka buwan.
Sa bag-ong desisyon ni Graft Investigation & Prosecution Officer III Jose Ronald Bersales niadtong Oktubre 23, 2014 ug giaprobahan ni Ombudsman Conchita Carpio Morales pagkasunod adlaw, gibaliwala ang Aguinaldo Doctrine nga gibarugan sa mga Moreno.
Laing apelar ang gisang-at sa mga Moreno sa Court of Appeals diin sila nangayo og temporary restraining order (TRO).
Matud ni Caesar nga subli nilang giduso ang Aguinaldo Doctrine ug gisanglitanan ang mga kasong administratiba nilang kanhi gobernador Gwendolyn Garcia ug kanhi Mandaue City mayor Thadeo Ouano nga gibasura human sila napili sa laing posisyon.
Si Bersales miingon nga si Aguinaldo sa iyang kaso subling napili isip gobernador samtang si Cynthia napili isip bise-mayor ug si Caesar napili nga mayor niadtong 2010 nga eleksiyon.
Apan si Caesar miingon nga si Garcia napiling kongresista samtang si Ouano napiling sakop sa hunta probinsiyal hinungdan sa pagkabasura sa tagsatagsa nila ka kasong administratiba.
Ang kaso gisang-at ni kanhi konsehal Danilo Margallo gumikan sa giingong pagbaligya sa magtiayong Moreno sa duha ka gubaon nga dumptruck sa usa ka junk shop sa kantidad nga P150 mil nga wala gipaagi sa subasta niadtong tuig 2008. – /GMR) (BANAT NEWS)
- Latest
