Linog mitay-og sa sugbo

CEBU, Philippines – Gitay-og sa linog ang dakbayan sa Mandaue; San Francisco, isla sa Camotes ug General Luna, Surigao del Norte ug mga silingang mga dapit kagahapon sa buntag.

Base sa earthquake bulletin sa Philippine Institute of Volcanology and Seismology (Phivolcs), nabatyagan sa dakbayan sa Mandaue ang 4.5 magnitude alas 9:19 sa buntag; sa San Francisco ang 2.8 magnitude alas 11:03 sa buntag samtang ang mas kusog nga 5.5 magnitude sa General Luna alas 12:41 sa udto.

Nabatyagan usab ang mga pagtay-og sa mga kasikbit nga dakbayan sa Sugbo ug Lapu-Lapu.

Nasigpatan sa Phivolcs ang epicenter sa linog ilawom sa dagat sa tunga-tunga nga bahin sa Pilar isla sa Camotes ug Leyte nga adunay gilawmon nga walo ka kilometros.

Hinuon wala’y gikataho nga nangaguba nga mga istruktura gumikan sa maong linog samtang wala usab nagkaguliyang ilabi na ang mga tinun-an.

Gihulagway nga epektibo ang gipahigayong earthquake drill sa Cebu City Disaster Risk Reduction Management Council ug Department of Education.

Gani sa Colegio del Santo Niño sa dakbayan sa Sugbo, giisip lang sa mga tinun-an nga earthquake drill ang ilang gihimo dihang nitay-og ang linog kagahapon.

Si Mayor Michael Rama nipahibawo nga wala’y gikanselar nga klase kagahapon. – GMR) (BANAT NEWS)