AFP ug PNP mihimo’g civic action

CEBU, Philippines - Ang kadagkoan sa AFP-Central Command nagpahigayon og medical ug dental mission didto sa Barangay Sinsin, bukirang bahin sa dakbayan sa Sugbo.

Lakip sa mga serbisyo nga ilang gihatag naglakip sa legal ug veterinary, libre’ng tupi ug libre’ng kaon.

Si Colonel Phillip Lapinid sa Civil Military Operations (CMO) Office nga nahinabi sa Banat News miingon nga gatusan ang nakapahimulos sa maong serbisyo sa Centcom.

Matud pa ni Lapinid nga nalipay ang mga tawo nga nakapahimulos sa maong mga libre nga serbisyo ug nalipay kaayo kay wala sila magtuo nga maabot pa didto ang kasundalohan uban sa mga kawani sa dakbayan sa Sugbo.

Si Major Rolando Acedo, deputy chief sa CMO, miingon nga kapin sa 500 ka tawo ang nakapahimulos sa maong kalihokan ug may 50 ka mananap ang nakapahimulos sa veterinary services.

Ang maong kalihokan gihimo tungod sa umaabot nga pagsaulog sa Centcom sa ilang anibersaryo karong Disyembre 1.

Samtang nakadawat og sayo nga pinaskohan sa Regional Public Safety Battalion 7 ang mga tinun-an sa Tubod Elementary School sa Barangay Tubod, lungsod sa Sibonga kaniadtong Lunes.

Mikabat og 50 ka bata ang nakadawat og mga school bags ug school supplies nga kabahin sa Sayong Pinaskohan sa RPSB7.  (BANAT NEWS)