Lalaking gibiyaan sa pamilya naghikog

CEBU, Philippines - Nangalisbo na ang baho sa patay’ng lawas sa usa ka tawo nga gituohang naghikog pinaagi sa pagbitik sa liston sa sapatos sa iyang liog sulod sa ilang panimalay sa Barangay Tilhaong, Consolacion.

Si Police Officer 3 Arthur Ariate sa Consolacion Police Station miila sa namatay nga mao si Manuel Apas Paran, 38, buwag sa asawa ug nag-inusara na lang nga nagpuyo sa nahisgotang dapit.

Matud pa ni Ariate nga ang anak nga babaye sa namatay nga miduaw unta niini maoy nakadiskubre nga dunay dautang nahitabo sa amahan tungod kay gitrangkahan niini ang tanang pultahan ug bintana ug nangalisbo ang baho sa sud.

Ang anak mibalik sa gipuy-an nila sa iyang inahan nga Judith Lutao Paran, 34, ug gipahibalo sa hitabo.

Inabagan ni Barangay Kapitan Ronaldo Alimoren mitawag sila sa kapolisan ug pugsanon nilang giablihan ang balay ug diha nila nadiskubrehan nga patay na si Manuel.

Ang asawa sa namatay mitug-an sa kapolisan nga nagumon sa drugas ug sigehan siya og kulata sa bana kaniadto mao nga ilaha kining gibiyaan. Gitambagan sa kapolisan ang asawa nga ipaubos sa autopsy ang lawas sa bana. (BANAT NEWS)