Lalaki nga giputlan og ulo ug kinatawo gilubong na
CEBU, Philippines - Emosyonal ang mga kabanay sa lalaki nga gipatay nga giputlan sa ulo ug kinatawo atol sa paglubong kaniya sa kataposang pahulayan sa usa ka sam-ang sa Tuburan kagahapon.
Si Alonie Olasiman, brutal nga gipatay ug ang lawas nakit-an diha sa sityo Makatol, Barangay Biga dakbayan sa Toledo.
Ang paryente sa iyang kapuyo nga si Glenn Versaga, 21, maoy miangkong mihimo sa maong linoog nga krimen ug nadakpan niadto lang adlaw nga Biyernes.
Gikonsiderar sa kapolisan nga sirado na ang kaso tungod kay nadakpan na ang suspek. Gihangop usab sa kabanay ni Olasiman ang kalamboan sa kaso human nadakpan ang suspek.
Nasikop ang maong suspek human dunay testigo nga misumbong sa awtoridad kabahin sa maong krimen nga matud pa binuhatan sa suspek, ug kay nakonsensya kini, gisuginlan niya ang mga opisyal sa barangay hinungdan sa pagkasikop sa suspek.
Apan buot paladman pa ni Senior Superintendent Noel Gillamac sa Cebu Provincial Police Office (CPPO) ang imbestigasyon sa maong krimen tungod sa pagduda nga aduna pa kini laing kauban.
Ang suspek gikatakdang pasakaan ugmang adlawa og kasong murder diha sa piskalya. Ang suspek miinsister nga giunhan ra niya ang biktima tungod kay gibaharan siya buk-an niini og ulo. (BANAT NEWS)
- Latest
