Polis napusilan

CEBU, Philippines - Usa ka polis ang napusilan atol sa anti-drug operation sa mga sakop sa Lapu-Lapu City 20 ka gagmay’ng pakete sa shabu ug usa ka dili lisensyadong pusil ang nakuha sa kapolisan sa dakbayan sa Lapu-Lapu atol sa gihimo nga buy-bust entrapment operation sa miaging Huwebes sa gabii.

Matud ni Police Senior Inspector Wilbert Parilla, hepe sa Lapu-Lapu City Police Office sa Station 3- Barangay Gun-ob ang napusilan sa wala nga paa mao si Police Officer 1 Raul Ruiz Jr. dihang misukol si Jason Montebon, 41,  nga nagpuyo sa maong barangay.

Dugang ni Parilla, tunga-tunga sa ilahang operasyon gipusil sa suspetsado si PO1 Ruiz atol sa ginukdanay. Gidemalas si Montebon kay naabtan sa mga kauban ni Ruiz.

Nakuha kang Montebon ang duha ka 100  pesos nga marked money, duha ka bala sa .9mm ug usa ka basiyo niini.

Si PO1 Ruiz giatiman karon sa Mactan Doctors Hospital ug luwas na ang kahimtang.

Samtang nadakpan usab sa Toledo City police ang gipasanginlang level 3 drug pusher nga si Alexis Velayo Cañilda  taga Purok Ipil-Ipil, Barangay Dumlog atol sa buy-bust operation nga gipangulohan ni Police Inspector Jovito Labra.

Nakuha gikan kaniya nga duha ka paketeng marijuana, pinaketeng shabu nga small, medium ug large nga pulos dunay sud nga gituohang shabu.

Gawas sa drugas nakuha usab gikan sa suspek ang usa ka bala sa Armalite, usa ka granada, usa ka kalibre .45 ug magazine nga adunay bala, drug paraphernalia ug P500 nga marked money.

Samtang duha ka medium size nga paketeng shabu ug mga drug paraphernalia ang nasakmit sa kapolisan gikan sa duha ka tawong nagmotor atol sa checkpoint diha sa dalan M.C. Briones sa Barangay Subangdaku, Dakbayan sa Mandaue.

Si Senior Police Officer 1 Michael Limalima sa Presinto 2 miila sa duha nga nadakpan nga mao sila si Janel Pepito, 27, taga Lataban, Liloan ug Renato Canin, 47, taga Zone Gabi, Barangay Paknaan, dakbayan sa Mandaue.

Ang nakadakop kanila mao ang grupo ni Inspector Ricky Calong nga nagbutang og checkpoint sa maong dapit.  (BANAT NEWS)