2 ka lending collectors, laing 5 gitulis

CEBU, Philippines - Nakuha sa duha ka wala mailhing lalaki ang P6 mil nga nakolekta sa usa ka lending collector human gitulis pasado alas 3 sa hapon niadtong Huwebes sa sityo Tabay, Tayud, Liloan.

Ang biktima mao si Sherwin Yrauda, 39, taga Mambaling, dakbayan sa Sugbo ug lending collector sa JJ Fast Credit Corporation. Si Yrauda miasoy nga samtang nagkolekta siya sa bayad sa kustomer nga si Wilma Crita, kalit nibutho sa luyo ang usa ka lalaki kinsa mideklarar og hold-up dayong ingon nga kwarta ra iyang tuyo.

Nunot sa pagdeklarar nga tulis maoy gihimo sa duha ka armadong lalaki ang pagkuha sa shoulder bag sa biktima nga gisudlan sa kwarta ug gimandoan ang biktima sa pagkanaug sa motorsiklo niini. Ang backrider nga tulisan maoy nibanos sa pagsakay sa motorsiklo sa biktima ug mipabulhot sa pagpadagan padulong sa lungsod sa Compostela.

Sa dakbayan sa Talisay, tag-iya sa usa ka tindahan sulod sa merkado sa Lagtang ang gitulis sa upat ka wala mailhing lalaki. Ang biktima mao si Joy Pistañas Quilniñeza, 43, taga Abalo Compund, San Isidro, sa maong dakbayan.

Nagsakay sa front seat sa iyang multicab ang biktima dihang niabot ang upat ka wala mailhing lalaki nga pulos nag-helmet kinsa usa kanila miti-on kang Quilniñeza og.45 pistol dayung kuha sa itom nga sling bag nga may P5 mil. Ang mga lalaki daling misibat sakay sa motorsiklo. Samtang   laing lending collector sa MJP Lending sa Lawaan, Talisay ang biktima sa duha ka wala mailhing tulisan nga nagsakay og motorsiklo sa sitio Sto. Niño, Banawa, Guadalupe, siyudad sa Sugbo niadtong Huwebes.

Giila ang biktima nga si McDonald Soria, 26-anyos, taga Lawaan 3, siyudad sa Talisay.

Nahitabo ang pagpanulis sulod sa usa ka kan-anan samtang nagkolekta ug nag-tally sa iyang koleksyon ang biktima dihang nihunong sa tungod sa kan-anan ang motorsiklo nga gisakyan sa mga tulisan. Usa kanila nition og pusil kang Soria dayon deklarar og tulis.

Gikuha sa mga tulisan ang sling bag sa biktima nga may sulod Blackberry nga cellphone kantidad og P5 mil, Nokia cellphone kantidad og P1,200, ug ang kwarta gikan sa koleksyon ug kaugalingon kwarta nga nikabat og 1,700 pesos. Apil sab nga gikuha sa mga tulisan ang yawi sa motorsiklo sa biktima.

Samtang upat ang biktima sa pagpanulis sa tulo ka wala mailhing tulisan sulod sa public utility jeepney sa dalan Tres de Abril, Labangon, siyudad sa Sugbo alas 7:15 sa gabii niadtong Huwebes. Nakuha sa mga tulisan gikan sa mga biktima ang ilang mahalong cellphones, mga bag ug uban pa’ng personal nga butang. (Sharmaine Kaye F. Obra ug Jean Lumapas, USJ-R MassCom Interns/GMR)(BANAT NEWS)