PTCA sa Naga supak pagpamutol sa kahoy
CEBU, Philippines - Gibabagan sa Parent-Teacher Community Association (PTCA) kauban sa mga environmentalists ang pagpamutol sa mga kahoy sulod sa Naga Central School.
Kagahapon sa buntag, ang presidente sa PTCA sa NCS, Winley Dela Fuente, uban sa pipila ka mga environmentalists niduso og petition for writ of kalikasan.
Tuyo niini nga kapanalipdan ang kalikupan ug gipaabot nga mahatagan sila og Temporary Environmental Protection Order aron mahunong ang pagpamutol sa kahoy sa maong tunghaan.
Si Dela Fuente mitataw nga dili siya supak sa pag-ugmad sa track and field oval apan daku siya’ng supak sa pagpamutol sa kahoy.
Ang Philippine Earth Justice Center niduso usab og motion for intervention sumala pa ni Atty. Rose-Liza Osorio nunot sa nakita nilang kalapasan sa pagpatuman sa proyekto.
Samtang ang Department of Environment and Natural Resources-7 miingon nga katungod sa grupo ang pagpasaka og petisyon.
Sa pagkakaron, gipangandaman sa DENR ang umaabot nga tree growing activity karong Nobiyembre 21 diin mao kini ang ihulip sa mga kahoy nga gipamutol sa NCS.
Ang CENRO sa dakbayan sa Naga ug si Mayor Valdemar Chiong daan na nga miingon nga kompleto ang ilang papeles ug alang sa kalamboan sa siyudad ang proyekto. (Decemay P. Padilla/GMR)(BANAT NEWS)
- Latest
