Dakong rob-gang nagtigom og pundo?

CEBU, Philippines - Wa na malipay ang kadagkoan sa Police Regional Office-7 sa sagunson nga pagpanulis nga nahitabo sa dakbayan sa Sugbo maong gipatawag sa Regional Intelligence Division-7 ang mga intelligence officers sa Cebu City Police Office.

Si Senior Superintendent Pablo “Paul” Labra II ang hepe sa RID-7 miingon nga gustong makigkita kanila sa deputy chief for operations sa PRO-7 nga si Senior Superintendent Conrad Capa. "Wala man ta diri nagkulang sa pag remind, especially sa command group pag-remind sa ubos kung unsay buhaton, daghan ta og gipatuman nga anti- criminality program aron mahimong sayon ang ilang trabaho," matud pa ni Labra.

Sumala pa ni Labra nga usa sa ilang hisgutan ang posibilidad nga dunay dakong grupo sa mga tulisan nga nia karon sa Sugbo  nga nagtigom og pundo pinaagi sa ginagmay nga operasyon aron molusad og mas dakong pagpanulis.

Sa miaging gabii, gitulis sa duha ka armadong lalaki ang Star Oil Gasoline Station sa  Barangay Tipolo, sa dakbayan sa Mandaue ug gidisarmahan pa ang guwardiya nga si Jovannie Malabago,20.

Matud pa nga nagpatobil pa ang duha ug pagkahuman giduol si Malabago ug gitionan og armas ug gidisarmahan kini. Human niini gitulis dayon ang kahera nga si Ivy Joy Gabutan, 20, ug gikuha ang halin nga P20,000.

Niini gihapong semanaha, nagsunod nga gitulis sa mga armadong lalaki ang duha ka convenience stores sa dakbayan sa Sugbo. (BANAT NEWS)