Target sa drug raid napusilan nakaikyas

CEBU, Philippines- Nakaeskapo sa mga kamot sa balaod apan gituohang nasamdan ang usa ka level 3 drug pusher sa lungsod sa Dumanjug nga nakigpinusilay sa kapulisan kauban ang iyang duha ka mga sakop sa barangay Tangil.

Kini ang gibutyag sa hepe sa Dumanjug Police nga si Senior Inspector Narciso Abapo nga nahinabi sa Banat News.

Matud pa ni Abapo nga dugay na nilang gipaubos sa surveillance ang ilegal nga kalihokan ni Allan Yap, 41, nagpuyo ra sab sa maong lugar ug dihang ilang nakompirmar mikuha sila og search warrant  gikan ni RTC Judge Leopoldo Cañete sa Branch 60 sa lungsod sa Barili.

Apan sa dihang paingon na unta mohamag ang kapulisan, nakabantay ang asawa ni Yap  ug daling mipahibalo sa iyang bana ug mga kauban kinsa daling nangambak  sa bintana ug namusil. Tungod niini mibalos sa pagpusil ang kapulisan ug gituohang naigo nila si Yap tungod kay dunay drayber sa multicab nga ilang nasugatan nga mitug-an nga gihangyo siyang ikarga si Yap padung sa tambalanan, apan guba man ang sakyanan. Atol sa pagsiksik sa balay niini, ilang naabtan ang usa ka Robin Pitogo, nga oiler sa barko, diha sa balay ni Yap ug nakuhaan og shabu. Lakip sa nakuha sa kapolisan sa balay ni Yap  ang mga drug paraphernalia ug usa ka daku nga putos sa drugas kantidad og P60,000.00. (BANAT NEWS)