Nanunggab, balay gisunog

CEBU, Philippines – Usa ka 22-anyos nga lalaki ang mitahan sa iyang kaugalingon ngadto sa kapulisan human niini gidunggab sa kamot ang iyang 83-anyos nga apohan ug gisunog pa g’yud niini ang balay sa iyang iyaan sa Barangay Hagnaya, San Remegio.

Ang suspetsado giila nga si Edimel Maglasang nga mitahan pipila ka oras ang nakalabay ug kini sab miangkon nga iyang nadunggaban ang iyang apohan nga si Eliseo Maglasang gamit ang gunting.

Gawas pa niini, iyang gisunog ang balay sa iyang iyaan nga si Analiza Maglasang ,42, nga naugdaw  ug nagbilin og danyos nga P500 mil.

Matud pa ni Police Officer 1 Wilfredo Bunado ang desk officer sa San Remegio Police miabot ang suspek sa balay sa iyaan ug pwerte niining sukoa sa wala pa masayring hinungdan.

Una niini gipasipad-an ang apohan nga si Eliseo nga misuway pagpakgang kaniya ug naigo kini sa kamot. Human niini mipalayo ang biktima dala ang asawa nga si Feliza, 83 anyos.

Apan inay nga mohunong sa iyang paghagis, giduslitan niini ang balay sa iyaan  una pa kini mitahan sa kapolisan. Si Fire Officer 3 Rolando Reuyan sa San Remegio Fire Station mitug-an nga ilang tun-an uban sa kapolisan ang kasong ipasaka batok sa suspek. – /EIM) (BANAT NEWS)