Seven Eleven gitulis

CEBU, Philippines – Gitulis sa mga armadong lalaki ang convenience store nga Seven Eleven sa Natalio Bacalso Avenue ning dakbayan ug gisakiyo ang halin nga P20,000 ingon man ang armas sa guwardiya.

Matud pa duha lang ka minutos dihang gihimo sa mga tulisan ang krimen sumala pa ni Senior Inspector Gerald Soquib, hepe sa Mambaling Police Station. Matud pa ni Soquib nga ang usa sa mga tulisan  susama og pamayhon ni Eugene Salingay, ang kanhi pulis nga nadestino sa dakbayan sa Oroquita, nga suspek usab sa mga pagpanulis sa dakbayan sa Sugbo.

Si Salingay usa sa gitumbok nga mitulis sa mga LBC branches kauban sa kanhi military intelligence agent nga si Leonardo Rama. Mihaom usab ang paghulagway sa usa sa mga tulisan kang Michael Baldesama nga una na sab nga naaresto kaniadto sa kaso gihapon sa pagpanulis.

Apan ang hepe sa City Intelligence Branch (CIB) Superintendent Romeo Santander nagkanayon nga ila pa nga subayon ang gihatag nga pamahayag sa testigos sa kapulisan sa Mambaling.

Duna’y upat ka mga trabahante sa sulod sa tindahan atol sa hitabo apil na ang guwardiya nga si Ian Adlawan sa Black Arrow Security Agency kansang . 9mm pistol gikuha sa mga tulisan.

Tungod sa nahitabong pagpanulis sa siyudad, ipatawag ni Mayor Michael Rama si Senior Superintendent Noli Romana ug Santander.

Hinuon matud sa mayor nga nagpasalamat na siya nga malinawon ang pagsaulog sa adlaw sa mga Santos ug Kalag tungod sa higpit nga pagbantay sa kapolisan.

Apan kinahanglang mapahunong sa kapolisan ang  mga kaso sa pagpanulis ug masulbad kini sa labing daling panahon. – /EIM) (BANAT NEWS)