Tree cutting dakong tabang sa K to12
CEBU, Philippines – Gipasabot ni Naga City Mayor Valdemar Chiong nga ang pagputol sa mga kahoy sa Naga Central School kabahin sa ilang kooperasyon alang sa K to 12 Program.
Matud ni Chiong nga buot nilang makabaton og pasilidad nga susama sa Abellana National School.
Buot usab nilang makabaton og dugang school buildings aron makabutang og kaugalingong track and field oval.
Bisan og dunay mga kahoy nga gipamutol nagpakabana gihapon sila sa kalikupan ilabi na pagpananom og mga kahoy. Ang siyudad mananom og dul-an 3 mil ka kahoy karong bulana.
Si Engr. Ma. Obdulla Lescano sa Community Environment and Natural Resources Office miingon nga dunay pagtugot sa DENR ang pagputol niini.
Nasayran nga imbes nga 79 ka punoan, 59 na lang ang gitugotang ipaputol kagahapon, 20 na ang naputol apan gipaabot nga mahuman kini tanan ugmang adlawa.
Ang maong luna nga tukuran og classrooms ug track and field gipanag-iya hinoon sa lokal nga kagamhanan sa dakbayan sa Naga. – /EIM) (BANAT NEWS)
- Latest
