Ex- iwahig inmate nanghasi gipriso

CEBU, Philippines – Usa ka 82- anyos nga kanhi binilanggo sa Iwahig Penal Colony  sa Palawan ang gidakop human kini nanghasi ug nagdaladala og pinote ug usa ka kalibre .22 nga armas diha sa lungsod sa Liloan. Ang gidakop mao si Felimon Bughao, 82,  nagpuyo diha sa Sitio Casantos, Barangay Cabadiangan, sa maong lungsod.

Si Police Officer 3 Jesson Gayo sa kapolisan sa maong  lungsod miingon nga hubog ug kalit lang kining mikuha sa iyang armas nga kalibre 22 nga puno sa mga bala.

Ang usa sa mga apo nga lalaki sa maong suspetsado maoy mihamag niini ug giilog ang dala niining armas.

Ang mga silingan niini daling nanawag og polis apan dihang naabot ang kapolisan naabtan ang suspetsado nga nagwarawara  na usab og pinote.

Sumala pa nga pagkakita niini sa mga polis dali niyang gibuhian ang dalang pinote ug mitahan. Sumala pa napriso kaniadto sa Iwahig ang suspek tungod sa kasong murder.  – /EIM) (BANAT NEWS)