Shabu ang gibayad human makig-sex

CEBU, Philippines – Gisikop sa Carbon Police ang usa ka 37- anyos nga lalaki kay imbes mobayad og kuwarta mibayad na hinuon kini og shabu human nakigtagay sa lawasnong kalipay sa usa ka 23-anyos nga commercial sex worker diha sa usa ka lodge sa Leon Kilat Street, Cebu City.

Ang gidakop sa kapulisan mao si Herbert Alcontin, taga Sambag 2, samtang ang mireklamo mao si Katerine (tinuod pangalan gipugngan sa Banat News) taga Barangay Mambaling, Cebu City.

Si Katerine mibutyag sa kapolisan nga nagkasabot silang duha ni Alcontin nga bayran kini og P700 bugti sa iyang serbisyo apan sa dihang nahuman na ang iyang bugno, imbis mohatag og kuwarta mitunol naman hinuon kini og usa ka paketeng shabu isip maoy         bayad.

Apan gipamugos sa babaye nga kuwarta ang iyang gusto ug dili drugas apan nasuko na hinuon si Alcontin hinungdan nga dali nagpakitabang ang babaye sa kapulisan.

Ang suspek naabtan diha sa duol sa Cebu South Bus Terminal ug positibong gitudlo sa babaye nga mao ang mitabla kaniya. Nakuha gikan sa suspek ang usa ka improvised tooter.

Matud pa ni Police Officer 2 Mario Nator sa Carbon Police nga nahinabi sa Banat News, kasong estafa ug kasong paghupot og drug paraphernalia ang atubangon sa dinakpan nga gikatakdang ipasaka karong adlawa.  – /EIM) (BANAT NEWS)