Giputla’g liog, kinatawo

CEBU, Philippines – Padayon karong giila sa kapolisan ang usa ka lalaki nga brutal kaayo nga gipatay gikuhaan og ulo ug kinatawo ug daghang samad sa kalawasan nga nakit-an diha sa Sitio Makatol, Barangay Biga, siyudad sa Toledo.

Matud pa ni Police Officer 3 Alfredo Barquin, imbestigador sa DAS Police Sub-Station nga nahinabi sa Banat News  usa ka Paulin Versaga kauban ang iyang asawa  maoy nakadiskubre sa maong biktima.

Sumala pa nga milabay sa maong lugar ang magtiayon dihang nakabantay sila og mga dugo sa dalan padung sa usa ka bangag nga dunay gilawmon nga tulo ka tiil ug dihang ilang gisusi ang ilawom, usa ka lawas sa tawo nga way sapot ang ilang nakita.

Gihulagway ni Barquin nga anaa sa 30 hangtod 40-anyos ang maong lalaki nga gibanabana nga 5’2 ang gitas-on ug duna’y tattoo sa ulo sa bitin sa iyang dughan.

Nagduda si Barquin nga ang mihimo sa krimen dunay dakong kasuko sa biktima.  “Og pagpatay lang nga motibo dili siguro ingon ato ka brutal sir. Grabeha ra pud. Ambot kaha og unsa nga kasuko ug unsa’y sala ato niya (biktima),” sigun pa ni Barquin.

Usa sa iyang gidudahan nga ‘babaye’ ang hinungdan sa motibo sa krimen tungod kay giputol ug wala na igkita ang kinatawo sa biktima.

Nagtuo usab si Barquin nga dili lang usa ka tawo ang mihimo sa krimen ug kaadlawon kini gihimo.

Nanawagan karon ang kapolisan kun si kinsa kadtong na-missing ang kabanay sa pagbisita sa ilang buhatan. – /EIM) (BANAT NEWS)