Tulisan natultolan sa gitagoan
CEBU, Philippines - Nadakpan sa follow-up operation sa kapolisan ang nitulis sa Remee’s General Merchandise sa M.L. Quezon, Cabancalan, dakbayan sa Mandaue alas 10 sa buntag niadtong Huwebes sa sitio Mansawa, Binaliw, dakbayan sa Sugbo.
Si SPO3 Marcos Noval Jr., imbestigador sa Investigation Detection and Management Bureau (IDMB), miila sa nadakpan nga si Ponciano Aspe alyas Ponz, 26-anyos nga nagpuyo sa maong dapit.
Matud ni Noval nga si Aspe ilang nadakpan pinaagi sa pagtabang ni Binaliw kapitan Wilson Bacor nga maoy naghatag kanila sa kasayuran sa gipuy-an sa suspek.
Si Noval miingon nga ang maong dinakpan mao usab giila nga nagtulis sa Remee’s General Merchandise nga gipanag-iya ni Hydie Cosedo kuyog sa wala hiilhing armadong mga lalaki nga nagsakay og motorsiklo.
Nagpatuo nga mga kustomer ang mga tulisan sa pagsulod sa tindahan apan sa pagduol sa cashier kalit lang kining gitionan sa armas ug mideklarar nga tulis.
Nakuha sa mga tulisan ang mokabat P12,000 kapin nga halin sa tindahan dayun sibat pahilayo sakay sa motorsiklo nga nagpaabot sa gawas.
Ang dinakpan temporaryong gibalhug sa detention cell sa Presinto 4. (Romeo T. Limpangog/GMR)(BANAT NEWS)
- Latest
