Wa kaabang nagsunog sa kaugalingon
CEBU, Philippines - Nagsunog sa kaugalingon sulod sa lawak nga giabangan ang usa ka lalaki kinsa giingong wala nakabayad sa iyang abangan sa sitio Sta. Ana, Labangon, dakbayan sa Sugbo kagahapon sa alas 9 sa buntag.
Ang padayon pa nga giatiman sa tambalanan naila nga si Abel Blaza, hingkod, ug nag-abang sa usa ka lawak sa panimalay nga gipanag-iya ni Elisiano Lapinid.
Matud ni Senior Fire Officer 1 Emiliano Daño sa Cebu City Fire Department nga base sa ilang imbestigasyon nasayran nga dili maayo ang pagtinagdanay ni Blaza ug sa landlady sa maong balay human wala nakabayad sa abangan.
Kagahapon sa buntag dihang naabot ang lalaki ug misulod sa lawak, pipila ka minutos baga nga aso ug kayo ang nipukaw sa mga nagpuyo sa maong balay. Gitabang sa mga silingan ang sunog ug nakita si Blaza nga didto lang gyud sulod sa lawak ug nakaangkon na og mga paso sa kalawasan ug dali nga gidala sa Vicente Sotto Memorial Medical Center (VSMMC).
Wala pa nasayri ang kahimtang ni Blaza sulod sa tambalanan samtang kasong arson ang posible niyang atubangon. (BANAT NEWS)
- Latest
